АНУ-ын Калифорни тэргүүтэй 16 муж улс АНУ-ын Ерөнхийлөгч Дональд Трампын Мексиктэй залгаа хил дээр хана барихад шаардлагатай хөрөнгө босгохын тулд онц байдал зарлах тухай шийдвэртэй холбогдуулан Дональд Трампын засаг захиргааг шүүхэд өгчээ.

Нэхэмжлэлийг Калифорни мужийн Хойд дүүргийн шүүхэд гаргасан байна. Ардчилсан намынхан мөн энэхүү шийдвэрийг эсэргүүцэж байгаа юм. Калифорнийн Ерөнхий прокурор Хавиер Весерра ерөнхийлөгч эрх мэдлээ урвуулан ашиглахыг зогсоох үүднээс Дональд Трампыг шүүхэд өгч байна гэж тайлбарлаад татвар төлөгчдийн мөнгийг дээрэмдэхийг зөвшөөрч болохгүй гэжээ. “Бидний хувьд, ерөнхийлөгчийн албан тушаал театрын тайз биш” гэж тэрбээр онцолжээ.

Конгресс хилийн ханын санхүүжилт олгохоос татгалзсаны дараа Дональд Трамп онц байдал зарлана гэж мэдэгдсэн билээ.

Үүнтэй зэрэгцэн либерал өмгөөлөгчдийн бүлэг дархан цаазат газар болон Техасын гурван газрын эзний нэрийн өмнөөс мөн Дональд Трампын эсрэг шүүхэд хандсан байна. Тэдний эзэмшиж буй газар дээр хилийн хана баригдах гэнэ.

Өнгөрсөн баасан гарагт /2019.02.15/ Ерөнхийлөгч Дональд Трамп онц байдал зарласнаар тэрбээр найман тэрбум ам.долларыг хилийн ханын санхүүжилтэд зориулан цэргийн төсвөөс гаргах боломжтой болно гэж мэдэгдсэн. 3200 км урт хил дагуу баригдах ханыг санхүүжүүлэхэд нийт 23 тэрбум ам.доллар шаардлагатай байгаа гэж тэрбээр тодруулжээ. Үүнийх нь төлөө өөрийг нь шүүхэд өгнө гэдгийг Трамп хүлээн зөвшөөрсөн бөгөөд онц байдлын тухай асуудал нь Дээд шүүхэд очиж дуусна гэж таамаглаж байгаа аж.