“Ногоон, ухаалаг, эрүүл, аюулгүй сургууль”-ийн үндэсний загвар төсөл хэрэгжиж эхэллээ

Засгийн газрын хуралдаанаар боловсролын байгууллагын ногоон хөгжил, дижитал шилжилт, эрүүл мэнд, аюулгүй байдлын шинэчлэлийг хэрэгжүүлэх “Ногоон, ухаалаг, эрүүл, аюулгүй сургууль”-ийн үндэсний загвар төслийг боловсруулан хэрэгжүүлэхээр шийдвэрлэлээ.

Цэцэрлэг, сургуулийн 50 орчим хувь нь 1990 оноос өмнө баригдсан бөгөөд дулаан алдагдал ихтэй, эрчим хүчний хэрэглээ өндөр, инженерийн дэд бүтцийн насжилт хэтэрсэн, ашиглалтын хугацаа бүрэн дууссан байна. Аймгуудад 30-40 сургууль мод түлдэг, Улаанбаатар хотод нам даралтын зуухтай 40 орчим сургууль байдаг аж. Төрийн өмчийн 700 гаруй сургуулийг халаахад жил бүр 418 тэрбум төгрөгийн эрчим хүч зарцуулж байна гэлээ. Алслагдсан сум, аймагт инженерийн дэд бүтэц бүрэн холбогдоогүйгээс шалтгаалан нүүрсний хэрэглээ өндөр учраас ашиглалтын зардал ч тогтмол өсөж байгааг Боловсролын сайд Л.Энх-Амгалан танилцуулсан юм. Засгийн газраас хэрэгжүүлж буй “Чөлөөлье” үндэсний санаачилгын “Ногоон чөлөөлөлт”-ийн зорилтын хүрээнд ногоон, ухаалаг, эрүүл аюулгүй 100 сургуулийг 2027 оны улсын төсөвт санхүүжилтийг нь суулгаж, аймаг, орон нутаг, нийслэлд нээхээр шийдвэрлэлээ. “Ногоон сургууль” нь нарны панел, батарей хураагуур буюу сэргээгдэх эрчим хүчээр ажиллах бөгөөд 

• Ногоон сургууль 
• Ухаалаг сургууль 
• Эрүүл сургууль
• Аюулгүй сургууль гэсэн 4 үндсэн зарчимд тулгуурлан хэрэгжих юм. 

Санаачилгыг улсын хэмжээнд үе шаттай хэрэгжүүлснээр, 

• Боловсролын байгууллагын эрчим хүч, усны хэрэглээний үр ашиг дээшилж, ашиглалтын зардал буурна. 
• Суралцагч, багш нарын дижитал ур чадвар нэмэгдэж, боловсролын байгууллагын дижитал шилжилт эрчимжинэ. 
• Хүүхдийн эрүүл мэндийн эрт илрүүлэг, эрүүл хооллолт, ус, ариун цэврийн үйлчилгээ сайжирч, эрүүл мэндэд ээлтэй сургалтын орчин бүрдэнэ. 
• Хүүхэд хамгаалал, сэтгэлзүйн болон цахим аюулгүй байдлын тогтолцоо бэхжиж, сургалтын орчин дахь эрсдэл, хүчирхийлэл, дээрэлхэлт буурна 
• Хүүхэд бүрийн биеийн болон сэтгэл зүйн эрүүл мэнд сайжирч, сургалтын үр дүнд ахиц гарна гэж тооцоолжээ. 

Хөтөлбөрийн хүрээнд энэ есдүгээр сарын 1-нд Чингэлтэй дүүрэгт анхны ногоон, ухаалаг, эрүүл, аюулгүй жишиг сургуулийг нээх гэж байна. Сэргээгдэх эрчим хүчээр ажиллах ногоон сургуульдаа “Chromebook” ашиглаж, технологид суурилсан ухаалаг орчинд хүүхдүүд суралцсанаар эрүүл, аюулгүй, ухаалаг орчинд боловсрол эзэмших боломж бүрдэнэ гэдгийг Ерөнхий сайд Н.Учрал онцоллоо.