Шатрын олимпиадад Монголын эмэгтэй шигшээ баг 7 дугаар байрт шалгарлаа

Узбекистаны Самарканд хотод болсон Дэлхийн шатрын 46 дугаар олимпиадад Монголын шатарчид түүхэн амжилт үзүүлжээ.

189 орны баг оролцсон тус олимпиадад Монголын эмэгтэй шигшээ баг 17 оноо авч, дэлхийн ТОП-10-т багтан 7 дугаар байр эзэлсэн байна. Ингэснээр 1990 оны Нови Садын олимпиадад тогтоосон 12 дугаар байрын амжилтаа ахиулж, түүхэн дээд амжилтаа шинэчилжээ.

Мөн Монголын эмэгтэй шатарчид АНУ, Энэтхэг, Польш зэрэг дэлхийн чансааг тэргүүлэгч багуудтай ижил оноо авч, коэффициентийн зөрүүгээр 7 дугаар байрт бичигдсэн байна.

Түүнчлэн 19 настай Х.Баясгалан 11 өрөг тоглож, 8 оноо авсан бөгөөд III ширээний хувийн үзүүлэлтээр дэлхийд 4 дүгээрт эрэмбэлэгджээ.

Харин Монголын эрэгтэй шигшээ баг нийт дүнгээр 26 дугаар байр эзэлж, “В” ангилалд мөнгөн медаль хүртсэн байна.